ಎಲೆಕ್ಟ್ರಾನ್, ಬೆಳಕು ಹಾಗೂ ಪ್ರಪಂಚ

wavefunction collapse ಅಥವಾ ತರಂಗ ಪ್ರವೃತ್ತಿಯ ಕುಸಿತ ಎನ್ನುವುದು ಮಾತ್ರಾ-ಭೌತಶಾಸ್ತ್ರ ಅಥವಾ quantum physics ನ ಒಂದು ಅತೀ ಮುಖ್ಯವಾದ ಪ್ರಕ್ರಿಯೆ. ಮಾತ್ರಾ ಕಣಗಳು ಶ್ರಾಡಿಂಗರ್ ಸಮೀಕರಣ (Schrödinger equation) ದ ಪ್ರಕಾರ ಅಲೆಯ ರೂಪದಲ್ಲಿ ವರ್ತಿಸುತ್ತವೆ. ನಮ್ಮ ಒಂದು ‘ನೋಟ’ (measurement) ದಿಂದ ಅಂತಹ ಸೂಕ್ಷ್ಮ ಕಣಗಳು ಬಹು-ಸಾಧ್ಯತೆಗಳ ಸ್ಥಿತಿಯಿಂದ ಏಕತ್ರ ಏಕಮೇವ ಸ್ಥಿತಿಗೆ ಅತ್ಯಂತ ಸಡನ್ ಆಗಿ ಪರಿವರ್ತಿತವಾಗುತ್ತವೆ. ನಿಮ್ಮ ಸೆಲ್ ಫೋನ್ ನಲ್ಲಿ ಅಥವಾ ಲ್ಯಾಪ್ಟಾಪ್ ನಲ್ಲಿರುವ ಎಲೆಕ್ಟ್ರಾನಿಕ್ ಸರ್ಕ್ಯೂಟ್ ಇವೆಯಲ್ಲ ಅಲ್ಲಿ ಇರುವುದು ಇಂತದ್ದೇ ಒಂದು ಮಾತ್ರಾ ಕಣ , ಅದು ಎಲೆಕ್ಟ್ರಾನ್! ನಾವು ಕಾಣುವ ಪ್ರಪಂಚವೆಲ್ಲವೂ ಈ ಎಲೆಕ್ಟ್ರಾನ್ ನ ನರ್ತನದ ಪರಿಣಾಮ! ಎಲೆಕ್ಟ್ರಾನ್ ಇಲ್ಲದೆ ಬೆಳಕಿರುತ್ತಿರಲಿಲ್ಲ, ಬೆಳಕಿಲ್ಲದೆ ಪ್ರಪಂಚವಿಲ್ಲ, ಬೆಳಕಿಲ್ಲದೆ ಅರಿವಿಲ್ಲ. ಎಲೆಕ್ಟ್ರಾನ್ ಎನ್ನುವ ಮಾತ್ರಾ-ಕಣ ಅಣುವಿನಲ್ಲಿ ಅಥವಾ ಅಣುಗುಚ್ಛದಲ್ಲಿ (molecule) ಹೆಚ್ಚಿನ ಶಕ್ತಿ-ಸ್ಥರ (energy level) ದಿಂದ ಕಡಿಮೆ ಶಕ್ತಿ-ಸ್ಥರಕ್ಕೆ ಕುಸಿದಾಗ ಬೆಳಕು ಉತ್ಪತ್ತಿ ಆಗುತ್ತದೆ. ಆ ಬೆಳಕೇ ನಾವು ನೋಡುವ ಪ್ರಪಂಚಕ್ಕೆ ಕಾರಣ!

ಸೂರ್ಯನಿಂದ ಹೊರಹೊಮ್ಮುವ ಬೆಳಕಿದೆಯಲ್ಲ ಆ ಬೆಳಕು ಸೂರ್ಯನ ಕೇಂದ್ರದಿಂದ ಹೊರಮೈ ವರೆಗೆ ಬರಲು ಕನಿಷ್ಠ ನಲವತ್ತು ಸಾವಿರ ವರ್ಷಗಳ ಕಾಲ ಬೇಕು. ಶಕ್ತಿಯುತವಾದ ಬರಿಗಣ್ಣಿಗೆ ಕಾಣದ ಬೆಳಕು ಸೂರ್ಯನ ಕೇಂದ್ರದಿಂದ ಹೊರಟು ಸ್ವೇಚ್ಛೆಯಾಗಿ, ಭೌತಿಕ ನಿಯಮಗಳಿಗೆ ಒಳಪಟ್ಟು ನಲವತ್ತು ಸಾವಿರ ವರ್ಷಗಳ ನಂತರ ‘ನಾವು ಕಾಣುವ’ ಬೆಳಕಾಗಿ ಹೊರಬರುತ್ತದೆ. ನಾವಿರುವ ಜಗತ್ತು ನಮ್ಮ ಅಳತೆಗೆ ಮೀರಿದ ಅದೆಷ್ಟು ವಿಸ್ಮಯಗಳನ್ನು ಒಳಗೊಂಡಿದೆ ನೋಡಿ! ಇವೆಲ್ಲಕ್ಕೂ ಮೂಲ ಹೇತು ಮಾತ್ರಾ-ಪ್ರಪಂಚದಲ್ಲಿ ಅಂದರೆ ಕಣ್ಣಿಗೆ ಕಾಣದ ಆಣ್ವಿಕ ಪ್ರಪಂಚದಲ್ಲಿ ನಡೆಯುವ ವಿಶಿಷ್ಟ ವಿದ್ಯಮಾನಗಳು, ಅದರಲ್ಲೂ ಅಲೆಯೂ ಅಲ್ಲದ, ಕಣವೂ ಅಲ್ಲದ, ಅವೆರಡೂ ಹೌದಾದ ಎಲೆಕ್ಟ್ರಾನ್! ಈ ಭೌತಿಕ ಪ್ರಪಂಚದ ನೇಯ್ಗೆ ಎಲೆಕ್ಟ್ರಾನ್ ನಿಂದಲೇ ಆಗಿದೆ.